konstituciya- tiykarǵÍ nÍzamÍmÍz

Bıyıl Qaraqalpaqstan Respublikası Konstituciyası qabıl etilgenligine 30 jıl toldı.
Konstituciya-ámelge asırılıp atırǵan demokratiyalıq reformalardıń hám olardıń nızamshılıq tiykarların jaratıwdıń baslı huqıqıy tiykarı, insan huqıq hám erkinlikleriniń isenimli qorǵalıwınıń kepili bolıp xızmet etedi.
Qaraqalpaqstan Respublikası Konstituciyası 1993-jıl 9-aprel kúni qabıl etilip, búginge shekem bul ullı tariyxıy sáne  bayram sıpatında saltanatlı túrde belgilenip kelinbekte.
Usı múnásibet penen mektebimizde saltanatlı keshe bolıp ótti. 
Keshede mekteptiń  huqıq páni muǵallimleri tárepinen  Qaraqalpaqstan Respublikası Konstituciyası  hám  mámleketlik gerbi haqqında maǵlıwmat berildi. 
Bunnan soń  oqıwshılar  konstituciyamızdaǵı statyalardan mısallar keltirdi hám taqmaqlar ayttı. 
Keshe dawamında mektep oqıwshıları tárepinen tayarlanǵan koncert baǵdarlaması  qoyıp berildi.  
Konstituciya-tiykarınan insanıylıq principlerge tiykarlanadı, oǵan muwapıq insan, onıń turmısı, erkinligi, ar-namısı, qádir-qımbatı hám basqa da ajıralmas huqıqları eń joqarı baylıq bolıp tabıladı. Konstituciyanıń 2-bólimi Insan hám puqaranıń tiykarǵı huqıqları, erkinlikleri hám minnetleri dep ataladı. Usı bólimniń  39-statyasında  hár kim  bilim alıw huqıqına iye ekenligi aytılǵan. Biypul ulıwma bilim alıwǵa mámleket tárepinen kepillik beriledi. Mektep isi mámlekettiń baqlawında boladı  delingen. 
Búgingi kúnde elimizde barlıq tarawlarda erisilip atırǵan jetiskenliklerimiz Konstituciyamızda bekkemlenip qoyılǵan qaǵıyda hám principler menen tıǵız baylanıslı.
Konstituciyamız huqıqıy sistemanıń tiykarǵı huqıqıy deregi sıpatında, oǵan basqa nızamlar qayshı keliwi múmkin emes. Sonlıqtan konstituciya- tiykarǵı nızamımız esaplanadı.

Zamira AWEZOVA
6-sanlı ulıwma orta bilim beriw mektebi direktorınıń ruwxıy- aǵartıwshılıq isleri boyınsha orınbasarı