«Adliya plus» — úyden shıqpay-aq mámleketlik xızmetlerden paydalanıw imkaniyatı
Búgingi kúnde zamanagóy informaciya-kommunikaciya texnologiyalarınıń jedel rawajlanıwı mámleketlik shólkemler hám xalıq ortasındaǵı baylanıstı túp-tiykarınan jańa basqıshqa alıp shıqtı. Eń baslısı, artıqsha qaǵazpazlıq, uzın-úzaq gezekler hám qımbatlı waqıttı joytıwlar sıyaqlı unamsız jaǵdaylar artta qaldı. Endilikde kóplegen mámleketlik xizmetlerden onlayn tárizde, úyden yamasa jumıs ornından shıqpay-aq paydalanıw múmkinshiligi jaratıldı. Bul baǵdarda Ózbekstan Respublikası Ádillik ministrligi tárepinen iske túsirilgen «Adliya plus» joybarı puqaralar ushın júdá úlken qolaylıqlar esigi boldı.
«Adliya plus» — bul eń áweli puqaralardıń huquqıy sawatlılıǵın arttırıw hám mámleketlik xizmetlerden elektron tárizde paydalanıw kónlikpelerin qáliplestiriwge qaratılǵan keń kólemli joybar bolıp tabıladı. Baǵdarlamanıń tiykarlı maqseti — mámleketlik xizmetlerdi xalıqqa jáne de jaqınlastırıw, onlayn platformalardan paydalanıw jolların ápiwayı hám túsinikli tilde túsindiriw hám puqaralardıń huquqıy máslahatlerge bolǵan mútajligin tez hám sapalı rásmiylestiriwden ibarat.
Bul sistema hám onıń menen integraciyalasqan onlayn platformalar puqaralarǵa tómendegi zárúrli baǵdarlarda jedel xizmet kórsetip kelmekte:
- Puqaralar ózlerin qızıqtırǵan hár qanday huquqıy máseleler, nızamshılıqtaǵı jańalıqlar hám ózgerisler boyınsha tikkeley onlayn tárizde qániygelerden operativ máslehatlar ala biledi.
- Ádillik tarawına hám mámleketlik xizmetlerge baylanıslı hár qanday arza, usınıs yamasa shaǵımdı uzaqtan turıp-aq rásmiylestiriw múmkin. Bul bolsa hújjettiń kórip shıǵılıw procesin onlayn rejimde baqlap barıw imkanın beredi.
-Kúndelikli turmısta kóp qollanılatuǵın nızamlı hújjetler, shártnamalar hám arza formalarınıń tayar úlgilerin onlayn júklep alıw hám olardan erkin paydalanıw imkaniyatı jaratılǵan.
Juwmaqlap aytqanda, «Adliya plus» baǵdarlaması onlayn mámleketlik xizmetlerdiń xalıq turmısına qanshelli tereń kirip barǵanlıǵınıń jarqın kórinisi. Sanlı texnologiyalar hám onlayn xizmetlerden belsendi paydalanıw — hár birimizdiń belsendi puqaralıq poziciyamızdı hám zaman menen teń qádem taslap atırǵanımızdıń baslı belgisi bolıp esaplanadı.
J.Tashimova
Taxtakópir rayonı Ádillik bólimi PHAJ bólimi baslıǵı
