Ma'daniyat GózzallÍq bayramÍnda

GózzallÍq bayramÍnda

0
GózzallÍq  bayramÍnda

Ádettegidey, 8-mart bayramı qarsańında  úlkemizge báhár paslı enip, qıs suwıǵı, qarı tábiyattı ele tárk etpegeni menen hayal-qızlardıń kewillerinde báhár, júzlerinde quwanısh. Óytkeni, kewillerimizdi bayram nápesi iyelegen.
Hár bir tarawda óziniń belgili dárejede ornı bar biziń Taxtakópir  rayonınıń belsendi hayal-qızları da hár qashanǵıday bayram múnásibeti menen  izzette boldı. Sebebi, olar hár bir shańaraqtıń gúli, jámiyettiń de  júgin qosa tartıp júrgen óz kásibiniń pidayıları, biri medicinadan bolsa, biri bilimlendiriwden,  jáne biri awıl xojalıǵı tarawınıń jankúyerleri.
Rayondaǵı “Ayzada” toyxanasında bayramǵa arnalǵan saltanatlı ilaj ótkerilip, onda rayon hákimi Jambul Adilov qatnasıwshılardı qızǵın qutlıqlap,  rayon xalqınıń eliw procentin quraytuǵın hayal-qızlardıń erler menen bir sapta turıp, rayonnıń sociallıq-ekonomikalıq ósiwinde teńdey miynetleri bar ekenin  maqtanısh penen atap ótti.
Haqıyqatında da,  respublikamızǵa belgili kóplegen miynet adamların tárbiyalap ósirgen analarımız,  rayonnan shıqqan belgili  hayal-qızlarımız da az emes.    
Prezidentimizdiń basshılıǵında turmısımızdıń barlıq tarawlarında keń kólemli reformalardı ámelge asırıw processinde jámiyetimizde hayal-qızlardıń abırayın arttırıw, bilim alıwı hám kásip iyelewi, jámiyetlik-siyasiy turmısqa belsene qatnasıwı ushın sharayatlar jaratıwǵa dıqqat qaratılǵan. Rayonda usınday múmkinshiliklerden paydalanıp atırǵan hayal-qızlar sanı kún sanap artıp barmaqta.
 Xalıq bilimlendiriw tarawında kóp jıllar dawamında jemisli miynet etip, jámiyette belsendilik kórsetip, jas áwladtı watansúyiwshilik ruwxında tárbiyalaw hám milliyligimizdi keń en jaydırıwda salmaqlı úlesin qosıp kiyatırǵan, 19-sanlı mekteptiń baslawısh klass muǵallimi Bibiajar Turkbenbaeva bayram  qarsańında «Mutabar ayol» kókirek nıshanı menen sıylıqlandı.
Áziyz analarımız, ómirimizdiń gúltajı bolǵan hayal-qızlar haqqında qanshama maqtanısh etsek te kóplik etpeydi. Biz mehir-muhabbat hám adamgershiliktiń dáslepki sabaqların analarımızdan, olardıń besigimizdiń átirapında pármana bolıp aytqan háyyiwlerinen alamız.Sonlıqtan da hayal-qızlar bayramın belgilew hám hayal-qızlardı húrmetlewde úlken máni bar.  
Bayram múnásibeti menen bir kese shay ústinde hayal-qızlar sáwbetleser eken, ózlerine kórsetilip atırǵan húrmet-izzetten  kewilleri tolǵanın ańlaw qıyın emes. Olarǵa bir awız shiyrin sóz, bir  dana gúldiń ózi jeterlidey. Sebebi, olardıń kewilleri-qollarındaǵı gúlden de názik.
Bayram sawǵaları, oyın-zawıqlar bayramnıń mazmunın jáne de bayıttı.

Gúlnara Dáwletmuratova