GAZDEN TUWRÍ PAYDALANÍŃ!
Bizge belgili, xalıq xojalıǵınıń rawajlanıwında gaz janılǵısı áhmiyetli hám tiykarǵı orında turatuǵın baylıq bolıp esaplanadı. Sonıń ushın bul jemisten qáwipsizlik qaǵıydaları tiykarında paydalanıwǵa itibardı kúsheytiw hár bir puqaradan talap etiledi. Keyingi waqıtta áne usı máselege mámleketlik áhmiyetke iye wazıypa sıpatında qaralıp atırǵanı da biykarǵa emes. Sonıń ishinde, Ózbekstan Respublikası Prezidentiniń "Respublika ekonomikası tarmaqların 2009-2010-jıl gúzgi-qısqı dáwirde turaqlı islewge tayarlawdı támiyinlew ilajları haqqında"ǵı qararında gózlengen tiykargı maqset te mine usı xalıq xojalıǵı orınları, sonday-aq, xalıqtıń turaq jayları puqaralardıń tınısh hám paraxat jasawı ushın barlıq ilajlardı kóriw, orınlarda órtlerdiń aldın alıw hám ekonomikalıq tarmaqlardıń qáwipsizligin támiyinlewden ibarat.
Biypárwalıq úlken joǵaltıwlarǵa alıp keletuǵının hár birimiz túsinbeymiz, ápiwayı qaǵıydalarǵa ámel etpew - bul tınıshlıq-paraxashılıq, qut-bereket, eń qádirli hám muqaddes shańaraq, shiyrin perzent hám jaqın insanlardan ayırılıw, bir ómirge mayıp adamǵa aylanıp qalıw degen sóz.
Sır emes, kúnler suwıtıwı menen bárshemiz bólmelerdi ısıtıw maqsetinde gaz hám elektr úskenelerinen paydalanamız, biraq qay tárizde? Aramızda nasaz yamasa qoldan jasalǵan elektr hám gaz úskenelerin paydalanǵan halda shańaraqtı kúlge aylandırıp, ózleri de qurban bolǵan insanlar da bar.
Usı jerde puqaralarımız qáwipsizlik qaǵıydaların bilse de, oǵan biypárwalıq penen qaramaqta. Gaz iyisin sezgende shırpı jaǵıw múmkin emesligi, gaz trubaların gaz plitalarına rezina shlangalar járdeminde ózbasımshalıq penen, órt qáwipsizligi qaǵıydalarına qayshı túrde jalǵap, shańaraǵına zıyan kórsetip atırǵan adamlar da tabıladı.
Bul bolsa ózleriniń materiallıq zıyan kóretuǵınına hám awır dene jaraqatın alıwına sebep bolmaqta. Bunday táshwish hám zıyan bolmawı, úyińizde apatshılıq bálesi payda bolmawı ushın órt qáwipsizligi qaǵıydalarına ámel etiwińizdi soraymız.
Mırzabek KAZAKBAEV
Taxtakópir rayonı AJB baslıǵınıń orınbasarı, mayor
