Кеўиллерди жасартқан "Жаслық"

30.03.2025 17:09 68 0

"Жаслық" ансамбли. Буннан 45 жыл алдын дүзилген бул ансамблди дүзиўшилер, атқарыўшылар ҳәм ансамблдиң репертуарындағы қосықларды өткен әсиримиздиң 80-90-жыллардағы тыңлаўшылары, ҳәзирги орта ҳәм үлкен әўладтағы жасы үлкенлеримиз жақсы биледи.

Талантлы көркем өнер ийеси Марат Абыллаевтың басшылығында ансамбль ағзаларының көпшилиги елден Қазақстан Республикасына көшип кетсе де, сол жақта өз өнерлеринен қол үзген жоқ. Полат Байымбетов, Сабит Даутов, Манас Имановлар устаз қосықшы Марат Абыллаев пенен биргеликте туўылған үлкеде мийманда болды. Туўылған жердиң көркем өнер сарайында ансамбльдиң көркемлик жақтан басшысы Марат Абыллаевтың 70 жасқа толыўына байланыслы салтанатлы ушырасыў кешеси өткерилди. Онда ансамбль ағзаларын олардың қосықларын сағынған тыңлаўшылар жыллы жүзлилик пенен күтип алды.

Район ҳәкими Жамбул Адилов ансамбль басшысын қутлы сәне менен қутлықлады. Алыстан туўылған жерге ат терлетип келген қутлы қәдемлерине тыңлаўшы халқымыз атынан миннетдаршылық билдирди. Юбилярға арнаўлы саўға сәлемлер тапсырылды. Естелик ушын арнаўлы сүўретлерге түсти.

"Жаслық" ансамблиниң аўылда жасап атырған ағзалары да бүгинги күнде көпшиликти қурайды. Олар биргеликте өткен жаслық жылларын биргеликте еслеп, бахытлы демлерине қайтқандай болды. Районымыздағы пайызлы орынларда, Бөршитаў менен Қаратерең бойларында саяхатқа шықты. Бул ушырасыў тек ғана қатнасыўшылар ушын емес, ал пүткил оны интернет тармақлары арқалы бақлап отырған бәрше көрерменлер ушын да әжайып ушырасыў болды деген ойдамыз.

Қәдемлериңиз қутлы болсын, жерлеслер! Ҳәр дайым туўылған үлкеге қуўанышларыңызды бөлисиўге келип кетиў, дийдарласыў бахыты усылайынша несип ете берсин!