Balalar napaqası kimlerge beriledi?

Ózbekstan Respublikası Prezidentiniń 2021-jıl 11-avgust kúngi «Kem támiyinlengen shańaraqlarǵa materiallıq járdem kórsetiw hám   kámbaǵallıq penen gúresiw kólemin jáne de keńeytiw is-ilajları haqqında»ǵı PP-6277-sanlı  Pármanına muwapıq 2021-jıl 1-sentyabrden baslap 14 jasqa shekemgi balaları bolǵan shańaraqlarǵa napaqa hám bala 2 jasqa shekemgi bala kútimi napaqası ornına kem támiyinlengen shańaraqlarǵa balalar napaqası engizildi. Bunda, balalar napaqasın belgilewde:
- Inabatqa alınatuǵın balalar jası 14 jastan 18 jasqa shekem asırıladı;
- Tólew múddeti 6 aydan 12 ayǵa uzaytıldı;
- onıń muǵdarın shańaraqtaǵı balalar sanınan kelip shıǵıp belgilew tártibi qollanıladı;
- jalǵız baslı puqaralarǵa, perzenti bolmaǵan yamasa barlıq perzentlerı 18 jastan úlken bolǵan kem támiyinlengen shańaraqlarǵa materiallıq járdem tayınlanadı.
Ózbekstan Respublikası Ministrler Kabinetiniń 2021-jıl 21-oktyabr kúngi “Xalıqtı sociallıq qorǵaw sistemasın jáne de jetilistiriw is-ilajları haqqında”ǵı qararı menen kem támiyinlengen shańaraqlardı «sociallıq qorǵaw birden-bir reestri» informaciyalıq sisteması arqalı anıqlaw, olarǵa kem támiyinlengen shańaraqlar balaları ushın napaqa hám materiallıq járdem belgilew hám tólew tártibi haqqında reje tastıyıqlandı.
Usı rejeniń 2-bap 7-bántine tiykarlanıp, shańaraqtıń hár bir aǵzasına jámi bir aylıq ortasha dáramat minimal tutınıw qárejetleri muǵdarınan aspaǵanda kem támiyinlengen dep esaplanadı hám balalar napaqası yaki materiallıq járdem jasaw ornı boyınsha shańaraqtıń háreket uqıplılıǵına iye aǵzasınıń jazba arzası  tiykarında tayınlanadı.

Jánibek PIRNAZAROV
Rayonlıq yuridikalıq xızmet kórsetiw orayı bas yuriskonsultı