BaxÍtlÍ balalar máskanÍ

Bùgingi kùnde  mektepke shekemgi bilimlendiriw sistemasɪna basqa tarawlar sɪyaqlɪ  ayrɪqsha itibar qaratɪlmaqta. Bunnan maqset-mektepke shekemgi jastagɪ balalar kòpshilik waqtɪn mektepke shekemgi bilimlendiriw shòlkeminde òtkeredi. Demek jeti  jasqa shekemgi alɪnġan tálim hám tárbiya insannɪǹ pùtkil òmiri dawamɪnda iyeleytuġɪn poziciyasɪn belgilep beredi. Sonday-aq,  bul tálim máskanlarɪ balaġa tek tálim-tárbiya berip qoymastan, olardɪǹ ruwxɪy álemin bayɪtɪwda, milliy qádiriyatlar tiykarɪnda kаmal tabɪwɪnda ayrɪqsha orɪn iyeleydi. 
Тaxtakòpir rayonɪ Mektepke shekemgi bilimlendiriw bòlimine qaraslɪ 3-sanlɪ mektepke shekemgi bilimlendiriw shòlkemi jas áwladqa zamanagòy talaplar tiykarɪnda tálim hám tárbiya berip kiyatɪr.   Shòlkem direktorɪ Sadikova Ulzar basshɪlɪq etken bul máskanda balalardɪǹ erkin òsiwi, bilim alɪwɪ, qábiletleriniǹ  rawajlanɪwɪ ushɪn keǹ imkaniyatlar jaratɪlġan. 140 orɪnġa mòlsherlengen bul tálim shòlkemi 2022-jɪlı kapital oǹlawdan shɪġarɪlɪp, zamanagòy kòriniske iye boldı.   Bilimlendiriw shòlkeminde jeti  tiykarġɪ,  bir qɪsqa mùddetli toparlar islep tur. Balalardɪǹ zaman talabɪna say tárbiyalanɪwɪnda tárbiyashɪ-pedagoglardɪǹ roli ùlken.  Shòlkemde  pedagoglardɪǹ derlik kòpshilik bòlegi joqarɪ maġlɪwmatlɪ, al orta maġlɪwmatlɪlarɪ bolsa kòp jɪllɪq pedagogikalɪq is-tájiriybesine iye. 6 tárbiyashɪ 2-kategoriyalɪ,  al 1 tárbiyashı 1-kategoriyalɪ bolɪp esaplanadɪ.  Mektepke shekemgi bilimlendiriw shòlkeminde hár kùnlik shɪnɪġɪwlar «Dáslepki qádem” mámleketlik oqɪw baġdarlamasɪna say òtkeriledi. Sonɪǹ menen birge inglis tili, shaxmat-shashka, ayaq oyɪn, sùwretlew, qol òneri hám taġɪ basqa qosɪmsha dògerekler shòlkemlestirilgen. Shɪnɪġɪwlar dawamɪnda balalar ushɪn interaktiv metodlardɪ qollaw hár kùnlik ùrdiske aylanġan. Bul metodlar arqalɪ balalardɪ ziyreklikke hám oylap tabɪwshɪlɪqqa baġdarlawġa erisilip kelmekte. Balalar arasɪnda shòlkem kesiminde sport jarɪslarɪ, kòrik taǹlawlar, bayram kesheleri turaqlɪ òtkeriledi. Jɪldɪǹ hár bir shereginde ata-analar májilisleri shaqɪrɪladɪ. Sonday-aq, shòlkemde rawajlandɪrɪwshɪ bes oray jumɪsɪn jetilistiriw maqsetinde kòrgizbeler shòlkemlestiriledi. Bul kòrgizbelerde balalardɪǹ miynetleri qoyɪlɪp, jaqsɪ islengen miynetler mùnásip bahalanadɪ. Sonɪǹ menen birge bala tárbiyasɪnda jankùyerlik kòrsetip kiyatɪrġan pedagoglar  òz waqtɪnda xoshametlenip kiyatɪr. Shòlkem jámááti rayonlɪq hám respublika kòleminde ilajlarda belsene qatnasɪp, òz lawazɪm májbùriyatlarɪn mùltiksiz orɪnlawġa at salɪsɪp kelmekte. 
Tárbiyalanɪwshɪlardɪǹ salamat awqatlanɪwɪn támiyinlewge ayrɪqsha itibar qaratɪlɪp, hár kùnlik racionġa  sɪpatlɪ hám paydalɪ azɪq-awqatlɪq ònimler kirgizilgen. Sonday-aq, shòlkemde tárbiyalanɪwshɪlardɪǹ qáwipsizligin qorġawġa maksimal dárejede itibar qaratɪladɪ.  
Balalar-òmir gùlleri, misli aq qaġaz sɪyaqlɪ girbiǹsiz.  Usɪ názik kewillerden jay alɪp , olardɪ ùlken òmirge jetelep kiyatɪrġan tárbiyashɪlar hár qanday sɪy-hùrmetke ɪlayɪq. 3-sanlɪ mektepke shekemgi bilimlendiriw shòlkeminde òz-ara hùrmetke hám insan qádirin ulɪġlawġa  tiykarlanġan atmosfera hár qanday adamdɪ òzine tartarɪ sòzsiz.   Balalardɪǹ hár kùni mazmunlɪ òtip  atɪrġan bul baxɪtlɪ máskannan ata-analardɪǹ da kewli toq. 
              
 

Genjegul Turemuratova 
3-sanlɪ mektepke shekemgi bilimlendiriw shólkemi metodisti, Ózbekstan xalɪq bilimlendiriw aġlasɪ