Fan va ta'lim Bir múrájat izinen

Bir múrájat izinen

22
Bir múrájat izinen

Rayonda jasawshı puqara M.J. hám basqalar, jámi 17 puqara rayonlıq ádillik bólimine arza menen múrájat etti. Olar óz múrájatında Respublikalıq Oba profilaktika orayı Qaraqalpaqstan Respublikası filialı rayonlıq bóliminde laborant hám miyirbiyke (sanitarka) lawazımlarında jumıs isleytuġınlıǵın bildirip, 2020-jılǵı jumıs orınların attestaciyadan ótkeriw komissiyası qararı menen miynet dem alısı kúnleri 56 kún etip belgilengenligin, biraq  2020, 2021, 2022-jıllar dawamında laborantlar 36 kún, sanitarkalar 24 kún miynet dem alısın alıp kelgenligin kórsetip, sol qalıp ketken kúnler ushın kompensaciya óndirip beriwdi soraǵan.
Anıqlanıwınsha, Respublikalıq Oba profilaktika orayı Qaraqalpaqstan Respublikası filialı rayonlıq bólimi (keyingi orınlarda – bólim)niń 2019-jıl 26-dekabrdegi 41-sanlı buyrıǵı qabıllanǵan hám usı buyrıq tiykarında Ózbekstan Respublikası Ministrler Kabinetiniń 2014-jıl 15-sentyabrdegi “Xızmetkerler miynetin qorǵaw ilajların jáne de jetilistiriw haqqında”ǵı 263-sanlı qararı talapları orınlanıwın támiyinlew boyınsha Ózbekstan Respublikası Miynet kodeksine muwapıq attestaciyalıq komissiya quramı dúzilgen. Miynet sharayatları hám ásbap-úskenelerdiń jaralaw qáwipliligi boyınsha jumıs orınların attestaciyadan ótkeriwdi shólkemlestiriw belgilengen.
Usı buyrıq tiykarında shólkemlestirilgen jumıs orınların miynet sharayatları boyınsha attestaciyadan ótkeriw materialları 2020-jıl 5-mayda AA 0002554-sanlı Ózbekstan Respublikası Bántlik hám miynet múnásibetleri ministrligi Mámleketlik ekspertizasınıń juwmaǵı alınǵan.
Attestaciyadan ótkeriw materialları boyınsha laborant hám miyirbiyke (sanitarka) lawazımlarına miynet sharayatları klasslarınan 4-klass qáwipli dárejesi berilip, miynet sharayatı qolaysız hám ayrıqsha bolǵan jumıslarda bánt bolǵanlar ushın jıllıq qosımsha dem alıslardıń dawamlılıǵın 19-24 kúnge shekem beriw belgilengen.
Bólim tárepinen laborantlar hám miyirbiyke (sanitarka)ler menen dúzilgen miynet shártnamalarınıń haqı tólenetuǵın jıllıq miynet dem alısları belgilengen bántlerine tiyisli tártipte ózgerisler kirgizilmegen hám  laborantlarǵa 2020, 2021, 2022-jıllar dawamında miynet dem alısların beriw haqqındaǵı buyrıqlarǵa muwapıq 24 jumıs kúninen ibárat tiykarǵı hám 12 jumıs kúninen ibárat qosımsha, jámi 36 jumıs kúninen ibárat, sonday-aq, miyirbiyke (sanitarka)lerge 2020, 2021, 2022-jıllar dawamında miynet dem alısların beriw haqqındaǵı buyrıqlarǵa muwapıq 15 jumıs kúninen ibárat tiykarǵı hám 9 jumıs kúninen ibárat qosımsha, jámi 24 jumıs kúninen ibárat miynet dem alısları berilip, sol dáwirden kelip shıqqan halda tiyisli bolǵan ortasha miynet haqı esaplap shıǵarılıp, dem alıs waqtı ushın haqı tólenip kelingen.
Negizinde, attestaciyadan ótkeriw materiallarınan tısqarı Ózbekstan Respublikası Ministrler Kabinetiniń 2014-jıl 15-sentyabrdegi 263-sanlı qararı menen tastıyıqlanǵan “Jumıs orınların miynet sharayatları hám ásbap-úskenelerdiń jaralaw qáwipliligi boyınsha attestaciyadan ótkeriw tártibi haqqındaǵı Reje”ge muwapıq belgilengen “Miynet sharayatı qolaysız hám ayrıqsha bolǵan jumıslarda bánt bolǵanlıǵı ushın jıllıq qosımsha dem alıslardıń dawamlılıǵı”na tiykarlanıp miynet sharayatı 4-klass qáwipli bolǵan jaǵdayda qosımsha dem alıstıń dawam etiw waqtı, kún esabında 19 – 24 kúnge shekem etip belgilengen.
Usıǵan muwapıq, rayonlıq ádillik bólimi tárepinen Respublika Oba profilaktika orayı Qaraqalpaqstan Respublikası filialı  rayonlıq bólimine puqara M.J. hám basqalar, jámi 17 puqaranıń buzılǵan huqıqların tiklew maqsetinde Ózbekstan Respublikası Miynet kodeksi hám Ministrler Kabinetiniń 2014-jıl 15-sentyabrdegi “Xızmetkerler miynetin qorǵaw ilajların jáne de jetilistiriw haqqında”ǵı 263-sanlı qararı talaplarına qatań ámel etiliwi támiyinlendi.  Bólim hám bul xızmetkerler ortalarında dúzilgen miynet shártnamalarınıń haqı tólenetuǵın jıllıq miynet dem alısları belgilengen bántlerine jumıs orınların miynet sharayatları boyınsha attestaciyadan ótkeriw materialları tiykarında qosımsha dem alıstıń dawam etiw waqtı qosıp esaplanatuǵınlıǵı haqqında tiyisli tártipte ózgerisler kirgiziliwine erisildi. 
Orınlanıwı májbúriy bolǵan usınıs kirgiziliwi nátiyjesinde puqara M.J. hám basqalar, jámi 17 puqaranıń buzılǵan huqıqların tikleniwine jámi 116153751 sum tóleniwi tiyis bolǵan qarızdarlıqtıń tolıq tólenip beriliwine erisildi.

Axmer ALLAMURATOV
Rayonlıq ádillik bóliminiń baslıǵı